شجر

اک حویلی ہوں اس کا در بھی ہوں
خود ہی آنگن خود ہی شجر بھی ہوں

اپنی مستی میں بہتا دریا ہوں
میں کنارہ بھی ہوں بھنور بھی ہوں

آسماں اور زمیں کی وسعت دیکھ
میں ادھر بھی ہوں اور ادھر بھی ہوں

خود ہی میں خود کو لکھ رہا ہوں خط
اور میں اپنا نامہ بر بھی ہوں

داستاں ہوں میں اک طویل مگر
تو جو سن لے تو مختصر بھی ہوں

ایک پھل دار پیڑ ہوں لیکن
وقت آنے پہ بے ثمر بھی ہوں

تہذیب حافی

غم

کچھ ضرورت سے کم کیا گیا ہے
تیرے جانے کا غم کیا گیا ہے

تا قیامت ہرے بھرے رہیں گے
ان درختوں پہ دم کیا گیا ہے

اس لیے روشنی میں ٹھنڈک ہے
کچھ چراغوں کو نم کیا گیا ہے

کیا یہ کم ہے کہ آخری بوسہ
اس جبیں پر رقم کیا گیا ہے

پانیوں کو بھی خواب آنے لگے
اشک دریا میں ضم کیا گیا ہے

ان کی آنکھوں کا تذکرہ کر کے
میری آنکھوں کو نم کیا گیا ہے

دھول میں اٹ گئے ہیں سارے غزال
اتنی شدت سے رم کیا گیا ہے

تہذیب حافی

نیند

نہ نیند اور نہ خوابوں سے آنکھ بھرنی ہے
کہ اس سے ہم نے تجھے دیکھنے کی کرنی ہے

کسی درخت کی حدت میں دن گزارنا ہے
کسی چراغ کی چھاؤں میں رات کرنی ہے

وہ پھول اور کسی شاخ پر نہیں کھلنا
وہ زلف صرف مرے ہاتھ سے سنورنی ہے

تمام ناخدا ساحل سے دور ہو جائیں
سمندروں سے اکیلے میں بات کرنی ہے

ہمارے گاؤں کا ہر پھول مرنے والا ہے
اب اس گلی سے وہ خوشبو نہیں گزرنی ہے

ترے زیاں پہ میں اپنا زیاں نہ کر بیٹھوں
کہ مجھ مرید کا مرشد اویسؔ قرنی ہے

تہذیب حافی

خواب

عجیب خواب تھا اس کے بدن میں کائی تھی
وہ اک پری جو مجھے سبز کرنے آئی تھی

وہ اک چراغ کدہ جس میں کچھ نہیں تھا مرا
جو جل رہی تھی وہ قندیل بھی پرائی تھی

نہ جانے کتنے پرندوں نے اس میں شرکت کی
کل ایک پیڑ کی تقریب رو نمائی تھی

ہواؤ آؤ مرے گاؤں کی طرف دیکھو
جہاں یہ ریت ہے پہلے یہاں ترائی تھی

کسی سپاہ نے خیمے لگا دیے ہیں وہاں
جہاں پہ میں نے نشانی تری دبائی تھی

گلے ملا تھا کبھی دکھ بھرے دسمبر سے
مرے وجود کے اندر بھی دھند چھائی تھی

تہذیب حافی

سزائے موت

میری لکنت پہ ترس کھاتے ہوئے دیکھ مجھے
کتنی مشکل سے ترا نام لیا جاتا ہے

تو اگر جانے لگا ہے تو پلٹ کر مت دیکھ
موت لکھ کر تو قلم توڑ دیا جاتا ہے

تہذیب حافی

چپ

تیرا چپ رہنا مرے ذہن میں کیا بیٹھ گیا
اتنی آوازیں تجھے دیں کہ گلا بیٹھ گیا
۔
یوں نہیں ہے کہ فقط میں ہی اسے چاہتا ہوں
جو بھی اس پیڑ کی چھاؤں میں گیا بیٹھ گیا
۔
اتنا میٹھا تھا وہ غصے بھرا لہجہ مت پوچھ
اس نے جس کو بھی جانے کا کہا بیٹھ گیا
۔
اپنا لڑنا بھی محبت ہے تمہیں علم نہیں
چیختی تم رہی اور میرا گلا بیٹھ گیا
۔
اس کی مرضی وہ جسے پاس بٹھا لے اپنے
اس پہ کیا لڑنا فلاں میری جگہ بیٹھ گیا
۔
بات دریاؤں کی سورج کی نہ تیری ہے یہاں
دو قدم جو بھی مرے ساتھ چلا بیٹھ گیا
۔
بزم جاناں میں نشستیں نہیں ہوتیں مخصوص
جو بھی اک بار جہاں بیٹھ گیا بیٹھ گیا
۔
[تہذیب حافی ]

کسے خبر ہے

کسے خبر ہے کہ عمر بس
اس پہ غور کرنے میں کٹ رہی ہے
۔
کہ یہ اداسی ہمارے جسموں سے
کس خوشی میں لپٹ رہی ہے
۔
عجیب دکھ ہے ہم اس کے ہو کر بھی
اس کو چھونے سے ڈر رہے ہیں
۔
عجیب دکھ ہے ہمارے حصے کی آگ
اوروں میں بٹ رہی ہے
۔
میں اس کو ہر روز
بس یہی ایک جھوٹ سننے کو فون کرتا
۔
سنو یہاں کوئی مسئلہ ہے
تمہاری آواز کٹ رہی ہے
۔
مجھ ایسے پیڑوں کے سوکھنے
اور سبز ہونے سے کیا کسی کو
۔
یہ بیل شاید کسی مصیبت میں ہے
جو مجھ سے لپٹ رہی ہے
۔
یہ وقت آنے پہ اپنی اولاد
اپنے اجداد بیچ دے گی
۔
جو فوج دشمن کو اپنا سالار
گروی رکھ کر پلٹ رہی ہے
۔
سو اس تعلق میں جو غلط فہمیاں تھیں
اب دور ہو رہی ہیں
۔
رکی ہوئی گاڑیوں کے چلنے کا وقت ہے
دھندھ چھٹ رہی ہے
۔
[تہذیب حافی]

منطق

کیا عجیب منطق ہے

ربط کی تکونی میں

میں ہمیش ۔ ۔ ۔ اکثر ہی

تیسرا تو ہوتا ہوں

دوسرا نہیں ہوتا